Mu gihe Umutaliyani Carlo Ancelotti yitegura kuva muri Real Madrid akerekeza mu ikipe ya Brazil,umunyabigwi w’iyi kipe,Xabi Alonso niwe byitezwe ko azamusimbura nubwo yinjiye mu kazi k’ubutoza mu Kwakira umwaka ushize.

Uyu mutoza wa Bayer Leverkusen, ufite imyaka 41, ngo azasimbura Carlo Ancelotti nyuma y’uko amasezerano y’uyu mutaliyani azarangira mu mpeshyi itaha.

Uyu mugabo wakiniye amakipe akomeye nkaLiverpool, Real Madrid na Bayern Munich, azaba atunguranye nahabwa akazi n’iyi kipe y’ubukombe.

Nyuma yo gusezera ku mupira muri 2017,Alonso yahawe gutoza amakipe y’abato ya Real Madrid hanyuma ajya gutoza Real Sociedad B yamazemo imyaka 3.

Uyu mutoza yahawe akazi muri Leverkusen mu mezi 11 ashize ariko ari gukora ibitangaza aho kugeza ubu iyi kipe itaratsindwa muri Bundesliga.

Nyuma yo kuyifasha gusoza ku mwanya wa 6 muri Bundesliga,ubu Leverkusen iri ku mwanya wa kabiri muri iyi shampiyona y’Ubudage inyuma ya Bayern barutanwa ibitego gusa.

Radio MARCA yavuze ko Madrid yamaze kwemera guha akazi Alonso kugira ngo azayitoze mu mwaka w’imikino utaha.

Iyi Radio yavuze ko nta gisibya aka kazi azahabwa.

Alonso azwi cyane mu Bwongereza ubwo yakiniraga Anfield kuva 2004-200, ahesha iyi kipe Champions League na FA Cup.

Umutoza Ancelotti amaze gutwara Champions League inshuro 4 harimo ebyiri muri AC Milan n’izindi ebyiri muri Real Madrid.

Alonso arahabwa amahirwe yo kwerekeza muri Real Madrid