Umutoza wa Chelsea,Mauricio Pochettino ashimangira ko ’atazigera atoza na rimwe ikipe ya Arsenal’ isanzwe ari mukeba wa Tottenham yamazemo imyaka irenga 5,akayigeza ku mukino wa nyuma wa UEFA Champions League.

Ibi yabitangaje mbere y’uko agaruka ku kibuga cya Tottenham nk’umutoza mukuru wa Chelsea,mu mukino bazahura ku wa mbere.

Pochettino yigeze kuvugwaho ko yifuzwa na Arsenal mu myaka ine ishize,ubwo yari imaze gutandukana na Unai Emery.

Uyu munya Argentine yamaze imyaka itanu atoza Spurs, ayigeza ku mukino wa nyuma wa Champions League, ariko yirukanwa muri 2019 mbere yo gufata akazi ka Chelsea muri iyi mpeshyi.

Ibyo byababaje abafana benshi ba Tottenham bitewe nuko bahangana na Chelsea.

Ubwo uyu mutoza yabazwaga kuri uyu wa gatanu icyo bisobanura gutsinda ikipe yahozemo, Pochettino yagize ati: ’Reba, niba wibuka, nahoze mvuga ko ikipe ntazigera ntoza ari Arsenal”.

’Urabizi ko mbabona nk’umwanzi ukomeye wa Tottenham.Biratangaje kugaruka kuko buri gihe ibyiyumvo nyuma y’imyaka ine… bizaba, ku bwanjye,ari umunsi ushimishije.

’Ariko ubwo ni ubuzima kandi dukeneye kubirenga. Turi abanyamwuga ariko nanone turi abantu.

Uyu mutoza yavuze ko indi kipe atatoza ari FC Barcelona kuko yaciye muri Espagnol anongeraho ko uyu mwaka abona Tottenham ishobora gutwara shampiyona kubera ukuntu iri kwitwara.

Tottenham iri ku mwanya wa mbere n’amanota 26 ndetse ishobora kugumana uyu mwanya igihe yatsinda iyi Chelsea izaba yakiriye.