Umutoza Mauricio Pochettino yavuze ko "bidashoboka" ko ikipe ye ya Chelsea yiyumva ko yoroshye imbere ya Manchester City barahura kuri iki cyumweru mu mukino wa shampiyona.

Chelsea iri ku mwanya wa 10 muri Premier League, ifite amateka mabi imbere ya Man City mu mikino baheruka gukin - kuko yatsinzwe imikino itandatu ishize mu marushanwa yose bahuriyemo ndetse ntiyinjiza igitego na kimwe.

Ariko bagiye guhurira mu mikino wo ku cyumweru kuri Stamford Bridge,iyi Chelsea ifite imbaraga nyuma y’intsinzi y’ibitego 4-1 bakubise Tottenham mu ntangiriro z’iki cyumweru.

Pochettino, muri shampiyona ye ya mbere ahawe gutoza Chelsea, yashimye cyane umutoza wa City, Pep Guardiola ndetse niyi kipe muri rusange mu kiganiro yagiranye n’abanyamakuru ku wa gatanu.

Ati: "Kuri njye ni ikipe nziza, bafite abatoza beza". "Tugomba kuvugisha ukuri - n’mwe mu makipe meza ku isi.

Iyo ufite intsinzi uba ugaragaza ko kuva hejuru kugeza hasi uba ukora ibintu byiza,byiza cyane."

Ariko uyu munya Argentine yavuze ko ikipe ye yerekanye mu mukino na Spurs ko bafite impano zikomeye n’ubushobozi bwo guhangana n’amakipe akomeye.

Ati: "Chelsea ntabwo yigeze igira iyo myumvire yo kumva iri hasi". "Ibyiyumvo buri gihe ni ’turi Chelsea’. Ntibishoboka, amateka arahari. (Ariko) Ndatekereza ko tudashobora kuvuga ngo" nitwe kipe ikomeye y’umunsi "ku cyumweru.

Tugomba kujya hariya twiteguye kugerageza guhatana,dufite ubushake ndetse n’ishyaka."

Guardiola uri ku mwanya wa mbere muri Premier League, yavuze ko ahangayishijwe n’imbaraga za Chelsea, ishaka intsinzi yabo ya kane mu mikino itandatu ya shampiyona.