Ikipe ya Real Madrid yo mu gihugu cya Espanye yatangaje ko yatandukanye n’uwari umutoza mukuru wayo, Xabi Alonso, wari umaze amezi arindwi muri izo nshingano.

Ni icyemezo iyi kipe yafashe kuri uyu wa Mbere, tariki ya 12 Mutarama 2026, nyuma yo gutsindwa na FC Barcelona ibitego 3-2 ku mukino wa nyuma wa Super Cup ya Espagne wakinwe ku Cyumweru.

Mu itangazo iyi kipe yashyize hanze kuri uyu wa mbere tariki ya 12 Mutarama 2025, yavuze ko batandukanye na Xabi Alonso ku bwumvikane bw’impande zombi.

Yagize iti” Twishimiye ku bamenyesha ko ku bwumvikane bw’impande zombi ikipe na Xabi Alonso, bafashe icyemezo cyo gusoza igihe cye nk’umutoza mukuru w’ikipe ya mbere.

Xabi Alonso azahora afitiwe urukundo n’icyubahiro n’abafana bose ba Real Madrid, kuko ari umunyabigwi wacu kandi buri gihe yagiye ahagararira indangagaciro z’ikipe yacu. Muri Real Madrid hazahora ari mu rugo.

Turashimira Xabi Alonso n’abari mu itsinda rye ry’abatoza ku bw’akazi gakomeye n’ubwitange bagaragaje muri iki gihe cyose, kandi tubifuriza amahirwe masa muri iki cyiciro gishya cy’ubuzima bwabo.”

Alonso asize FC Real Madrid iri ku mwanya wa Kabiri muri Shampiyona ya Espagne irushwa na FC Barcelona ya mbere amanota ane.

Mu mikino 29 yatoje Real Madrid yatsinzemo 22, inganya ine atsindwa itanu.

Uyu mutoza yasimbuwe na Álvaro Arbeloa wari usanzwe atoza ikipe ya kabiri, Real Madrid Castilla.

Xabi Alonso yatandukanye na Real Madrid yari amazemo amezi arindwi

Alvaro Arbeloa ni we wagizwe umutoza mushya Real Madrid