Umwambaro w’umunyabigwi mu mupira w’amaguru ku isi, Edson Arantes do Nascimento ‘Pelé’, yatwaranye igikombe cy’isi cyo mu 1958, wagurishijwe miliyoni 4,9$ [7.215.803.700 Frw].

Pelé ni umwe mu babayeho mupira w’amaguru wakoze ibidasanzwe, aho yegukanye amarushanwa atatu y’Igikombe cy’Isi, umukinnyi muto wegukanye Igikombe cy’Isi, umukinnyi muto watsinze ibitego bitatu mu mukino umwe, ndetse akaba ari na we watsinze ibitego byinshi, aho yinjije 1279 mu mikino 1363.

Akimara kwegukana Igikombe cy’isi bwa mbere mu 1958, umwambaro we yawuhaye mugenzi we Edvaldo Alves de Santa Rosa ‘Dida’, nyuma na we waje kuyishyikiriza ingoro y’amateka ya Brésil.

Mu 2004, iyi ngoro yawugurishije mu cyamunara n’inzu igura ikanagurisha imitako, imikufi n’ibindi bikoresho bihenze ya Christie’s, iwutangaho 105.600$.

Gusa na yo yawusubije mu cyamunara, ugurwa n’indi nzu igurisha ibikoresho bihenze ya Sotheby’s, igurwa miliyoni 4.9$ [7.215.803.700 Frw], ibituma uba umwambaro wa kabiri w’umukinnyi wa ruhago uhenze, inyuma y’uwa Diego Maradona yakinanye mu 1986 wagurishijwe miliyoni 9,5$ [14.091.575.900 Frw] mu 2022.

Yambaye uyu mwambaro, Pelé yatsinze Suède igitego afite imyaka 17, afasha igihugu cye kwegukana Igikombe cy’Isi cyo mu 1958. Aka gahigo ko kwinjiza igitego ku mukino wa nyuma ari muto nta wundi uragakuraho.

Mu 2022 Pelé yitabye Imana ku myaka 82 azize indwara ya kanseri.

Ibindi byagurishirijwe rimwe n’umwenda we harimo igitambaro cya kapiteni cyambawe na Diogo Maradona wakiniraga Argentine mu 1986, ubwo yatsindaga igitego cy’ukuboko cyiswe ‘Hand of God’. Iki cyagurishijwe 512.000$ [753.977.856 Frw].

Umwambaro Lionel Messi yambaye ari muri FC Barcelone ubwo yavaga inyuma igatsinda Paris Saint-Germain ibitego 6-1 muri ⅛ cya UEFA Champions League mu 2017, wagurishijwe 217.600$ [320.440.588 Frw].

Umwambaro wa David Beckham yambaye akina umukino wa 50 mu Ikipe y’Igihugu y’u Bwongereza mu 2002, wagurishijwe 51.200$ [75.397.785 Frw].