Kuri uyu wa Gatandatu, saa cyenda z’amanywa kuri Kigali Pelé Stadium, ikipe ya APR FC irakira Rayon Sports mu mukino w’umunsi wa 24 wa shampiyona uba ari uwa 102 hagati y’aya makipe yombi.

Sponsored Ad

Mu mikino 102 bamaze guhura, ikipe ya APR FC imaze gutsindamo 43 Rayon Sports itsinda 32 amakipe yombi anganya imikino 26. APR FC ni yo imaze kwinjiza ibitego byinshi aho yatsinze 135 mu gihe Rayon Sports yinjije ibitego 126, byose bikaba 261 byatsinzwe n’impande zombi.

Ikipe ya Rayon Sports yamaze imyaka ine idatsinda APR FC mu marushanwa yose, hagati y’itariki 20 Mata 2019 ubwo yaherukaga kuyitsinda 1-0 na tariki 12 Gashyantare 2023 ubwo yongeraga kuyitsindira i Huye 1-0 nanone. Hagati muri iyo myaka isaga ine bakinnyemo imikino irindwi (7) APR FC itsinda itanu(5) banganya imikino ibiri(2).

Rayon Sports mu gihe cya vuba ni yo iyoboye mu mikino ihuza amakipe yombi kuko imaze imikino ine idatsindwa na APR FC mu marushanwa yose bahuriyemo, dore ko kuva muri Gashyantare 2023 aya makipe amaze guhura inshuro eshatu(4). Muri izi nshuro harimo ebyiri muri shampiyona, imwe mu Gikombe cy’Amahoro ndetse n’undi mukino w’igikombe kiruta ibindi(Super Cup 2023).

Muri iyi mikino yose, Rayon Sports yatsinze 3(1-0, 1-0, 3-0) yinjizamo ibitego bitanu hanyuma inganya umwe uheruka kubahuza muri shampiyona banganya 0-0.

APR FC nta gitego na kimwe yinjije mu izamu rya Rayon Sports muri iyi mikino yose uko ari ine

Muri iyi mikino harimo ibiri y’ibikombe birimo Igikombe cy’Amahoro n’igikombe kiruta ibindi byose Rayon Sports yatsinze mukeba ikabitwara.

Umwihariko w’umukino wa APR FC na Rayon Sports

Umukino uhuza Rayon Sports na APR FC ni wo winjiza amafaranga menshi ku kibuga mu mikino yose ibera mu Rwanda.

Mu 2019, APR FC na Rayon Sports, buri umwe yinjije asaga miliyoni 60 Frw ku mukino yakiriye muri uwo mwaka.

Ubusanzwe, umukino wazihuje zombi, wakundaga gushyirwa kuri Stade Amahoro i Remera kubera ubwinshi bw’abafana baba bitezwe ariko ubu iri kubakwa.

Mu 2021, bwa mbere mu mateka y’aya makipe yombi, yakiniye mu Bugesera nta bafana bari muri Stade kubera icyorezo cya COVID-19.

Umwaka wa 2017, ni wo wonyine aya makipe yabashije guhuramo inshuro nyinshi, dore ko yahuye inshuro eshanu mu marushanwa atandukanye, ibintu bitigeze bibaho mu mateka y’aya makipe yombi mbere.

Rayon Sports irarushwa na APR FC amanota 10 mu gihe baraba bakina umunsi wa 24 wa shampiyona.