Umunya Nigeria,Victor Mbaoma niwe watowe nk’umukinnyi witwaye neza kurusha abandi mu kwezi gushize ahigitse abarimo Luvumbu na Muhadjiri Hakizimana.

Sponsored Ad

Ibihembo byo gutora umukinnyi wahize abandi muri shampiyona y’u Rwanda biri gutangwa n’imwe muri Kompanyi zicuruza amahirwe,byatangiye gutangwa mu ijoro ryo kuri uyu wa Kabiri.

Victor Mbaoma Chukwemeka wa APR FC wasoje uKUBOZA afite ibitego byinshi ni we wabaye umukinnyi wahize abandi byatumye ahabwa igikombe n’akayabo ka miliyoni y’amafaranga y’u Rwanda.

Yahigitse Bigirimana Abedi na Hakizimana Muhadjili ba Police FC ndetse na Luvumbu Nzinga wa Rayon Sports.

Igitego cyiza cy’ukwezi cyabaye icya Elie Kategaya waguzwe na APR FC akaba yaragitsinze agikinira Mukura VS ubwo yahuraga na Gasogi United. Igitego cye cyahize icya Hakizimana Muhadjili, Sharif Bayo ndetse na Samuel Pimpong.

Umutoza mwiza yabaye Mashami Vincent wa Police FC warushije Afahmia Lofti wa Mukura VS, Thierry Froger wa APR FC na Habimana Sosthene wa Musanze FC.

Umunyezamu wakuyemo umupira ugoye [Save y’ukwezi] yabaye Nzeyurwanda Djihad wahawe igihembo ahigitse Niyonkuru Pascal, Sebwato Nicholas na Simon Tamale.

Abitwaye neza bose bashyikirijwe igikombe giherekejwe n’amafaranga ibihumbi 300 Frw usibye Mbaoma wahawe miliyoni 1 Frw. Buri kwezi ibi bihembo bizajya bitangwa.

Shampiyona y’u Rwanda igeze ku munsi wa 16 aho urutonde rw’agateganyo kugeza ubu ruyobowe n’Ikipe y’Ingabo z’Igihugu ifite amanota 33 ikarusha Police FC abiri gusa.