Igihugu cya Vietnam cyatangaje ko kiri mu mushinga wo kubaka stade izaba ari yo nini ku Isi, izajya yakira abantu 135,000 bicaye neza.

Iyi stade izitwa Trong Dong Stadium, imirimo yo kuyubaka yatangiye mu Ukuboza 2025 bikaba biteganyijwe ko izafungurwa ku mugaragaro mu mwaka wa 2028.

Uyu mushinga ugamije gutuma Vietnam iba kimwe mu bihugu bikomeye ku Isi mu kwakira amarushanwa mpuzamahanga ya siporo n’ibitaramo bikomeye.

Leta ya Vietnam ivuga ko iyi stade izaba yujuje ibisabwa n’amashyirahamwe akomeye arimo FIFA, AFC, Inama Nkuru ya Siporo muri Aziya n’andi mashyirahamwe mpuzamahanga, bityo igatanga amahirwe ko iki gihugu kizakira amarushanwa akomeye nka ASIAD, Imikino Olempike, Igikombe cy’Isi n’andi marushanwa akomeye ku rwego rw’Isi.

Trong Dong Stadium izaba iruta izindi stade zose ku Isi ndetse ikazaba iruta n’iya Hassan II Stadium yo muri Morocco iri kubakwa izaba ifite ubushobozi bwo kwakira abantu 120,000.

Iyi stade izaba ifite igisenge gikururwa (retractable roof), kizayifasha kwakira imikino itandukanye, ibitaramo by’abahanzi, iminsi mikuru, n’ibindi bikorwa binini.

Mu miterere yayo, Trong Dong Stadium izaba ifite ishusho ishingiye ku ngoma y’umuringa yo mu muco wa Dong Son, ikimenyetso cy’umuco wa kera wa Vietnam, isobanura ubumwe bw’abaturage, imbaraga n’igihe kirekire.

Vietnam igiye kubaka stade izaba ari yo nini ku Isi yakira abantu 135,000