Ikipe y’Igihugu ya Argentine yasezereye Cap-Vert mu Gikombe cy’Isi iyitsinze ibitego 3-2 mu minota 120 y’umukino wa 1/16, imisifurire yo muri iri rushanwa yongera kwibazwaho.

Uyu mukino wabaye mu gicuku cyo kuri uyu wa Gatandatu, tariki ya 4 Nyakanga 2026, wari witezweho korohera umunyabigwi mu mupira w’amaguru, Lionel Messi.

Igitego rukumbi cya Lionel Messi cyabonetse ku munota wa 29, ni cyo cyabaye ikinyuranyo mu gice cya mbere cy’uyu mukino, ariko mu cya kabiri Cap-Vert ikina bidasanzwe ishaka kwishyura, ku munota wa 59 Deroy Duarte ayibonera igitego.

Mu minota 30 y’inyongera ni bwo habonetse ibindi bitego, Lisandro Martínez yatsinze icya kabiri cya Argentine, Sidny Lopes Cabral wa Cap-Vert aracyishyura, mbere y’uko Diney Borges yitsinda icyaheshje intsinzi Argentine.

Myugriro wa Argentine, Nicolás Tagliafico, yagize ikibazo mu mukino hagati ajya kuvurirwa hanze, Cap-Vert ibona coup-franc, abasifuzi bategereza ko asubira mu kibuga nyamara bitemewe ahubwo umukino ugomba gusubukurwa.

Ku munota wa gatanu w’inyongera kuri 90 y’umukino, Argentine yabonye coup-franc, ariko Lionel Messi yiba umugono Cap-Vert ayitera Vozinha agipanga urukuta, yewe n’umusifuzi ataratanga uburenganzira, ariko ku bw’amahirwe uyu munyezamu wa Cap-Vert awukuramo.

Ni umukino utavuzweho rumwe ku misifurire, dore ko ku munota wa karindwi w’inyongera kuri 90 y’umukino, Cap-Vert yashoboraga kubona coup-franc nziza hafi y’izamu, ivuye ku ikosa Leandro Paredes yakoreye Helio Varela ariko umusifuzi akabyirengagiza.

Uyu mukino wongeye kwerekana Vozinha nk’umunyezamu mwiza, kuko yakuyemo imipira ikomeye umunani, irimo ibiri ya Lionel Messi yashoboraga gutuma iyi kipe isezererwa hakiri kare.

Nubwo Argentine yakomeje yiyushye akuya, rutahizamu wayo Lionel Messi akomeje kuyobora abafite ibitego byinshi mu Gikombe cy’Isi kuko agejeje birindwi, akaba yujuje n’ibitego 20 mu mateka y’Igikombe cy’Isi, ari na we ufite byinshi.

Muri 1/8, Argentine izahura na Misiri yasezereye Australie kuri penaliti 4-2, nyuma y’aho amakipe yombi anganyije igitego 1-1.

Undi mukino wabaye mu rukerera wasize Colombia isezereye Ghana ku gitego 1-0, cyinjijwe na Jhon Arias, ikomeza muri 1/8 aho izahurira n’u Busuwisi.