Umunya-Espagne, Lamine Yamal, ukinira FC Barcelone ni we mukinnyi uhenze ku Isi kugeza ubu, kuko ikipe yamwifuza yamutangaho nibura miliyoni 402,3€.

Sponsored Ad

Nyuma y’umwaka w’imikino wa 2024/25, Lamine Yamal yahise yongera amasezerano y’imyaka itandatu muri FC Barcelone, azageza mu mpeshyi ya 2031, mu gihe indi kipe yamukenera, ibyamugendaho byatwara miliyari 1€.

Ikigo cy’Abasuwisi cya CIES Football Observatory gikora ubushakashatsi mu mupira w’amaguru, cyagaragaje ko nyuma y’aya masezerano, yahise aba umukinnyi uhenze kurenza abandi.

Aho cyagaragaje ko aramutse avuye muri iyi kipe, yatangwaho nibura miliyoni 400€, agahita akuba hafi kabiri ayo Neymar Junior yaguzwe mu 2017, ubwo yavaga muri FC Barcelone yerekeza muri Paris Saint-Germain.

Icyo gihe uyu Munya-Brésil yatanzweho miliyoni 222€, zatumye aba umukinnyi wa mbere wahenze mu mupira w’amaguru.

Lamine Yamal yageze muri FC Barcelone akina umukino wa mbere afite imyaka 15, aba uwa gatanu ukoze ayo mateka. Kuva yagera muri iyi kipe, amaze gutsinda ibitego 25, mu gihe Lionel Messi ufatwa nka nimero ya mbere ku Isi icyo gihe yari amaze gutsinda bibiri gusa.

Kuri iyi myaka ye mike yabashije kweguka Igikombe cya Euro ari kumwe n’Ikipe y’Igihugu ya Espagne, aho yegukanye igihembo cy’umukinnyi mwiza ukiri muto ndetse n’uwatsinze igitego cyiza.

Yafatanyije na FC Barcelone kwegukana ibikombe bibiri bya Shampiyona ya Espagne, Copa del Rey ndetse na Supercopa de España.

Mu mwaka ushize yabaye umukinnyi mwiza w’u Burayi ukiri muto.

Ku mwanya wa kabiri w’abakinnyi bahenze hari Erling Haaland wa Manchester City, uhagaze miliyoni 240€, ku wa gatatu hakaza Jude Bellingham wa Real Madrid wa miliyoni 234€, Kylian Mbappé wa Real Madrid bakinana na we ari ku mwanya wa kane ahagaze miliyoni €193, mu gihe Jamal Musiala wa Bayern Munich ari ku wa gatanu ahagaze miliyoni €155.