Umutoza Zinedine Zidane wari umaze kubaka izina mu ikipe ya Real Madrid, amaze gutungura benshi mu bakunzi ba ruhago atangaza ko asezeye ku kazi, nyuma y’imyaka 2 n’igice yari amaze akora amateka muri iyi kipe yo muri Espagne.

Uyu mugabo uheruka gufasha Real Madrid gukora amateka yo kwegukana UEFA Champions League ku nshuro ya 3 yikurikiranya ku wa Gatandatu w’icyumweru gishize atsinze Liverpool ibitego 3-1,atunguye abatuye isi by’umwihariko abakunzi ba Real Madrid avuga ko asezeye ku kazi ko gutoza ubukombe Real Madrid.

Umunyabigwi Zidane yasezeye muri Real Madrid

Uyu mugabo w’imyaka 45 wari utangiye kuzamura izina rye mu bushorishori bw’abatoza b’ibihangange, avuye muri Real Madrid ayihaye ibikombe 9 birimo UEFA Champions League 3 zikurikiranya.

Biravugwa ko atumvikanye n’ubuyobozi bwa Real Madrid burangajwe imbere na Florentino Perez, ku kuntu yitwaye muri La Liga uyu mwaka aho yaruhijwe amanota menshi cyane na FC Barcelona ndetse arangiza umwaka w’imikino atayitsinze.

Mbere ya saa sita nibwo Real Madrid yahamagaje igitaraganya ikiganiro n’abanyamakuru ku rubuga rwayo rwa Twitter,none kirangiye kabuhariwe Zinedine Zidane atangaje ko yeguye.

Zinedine Zidane yitwaye kigabo muri Real Madrid

Florentino Perez yabwiye abanyamakuru ko ku munsi w’ejo aribwo Zinedine Zidane yamusanze mu biro bye akamubwira ko yifuza kuva muri Real Madridndetse nawe yatunguwe n’iki cyemezo cy’uyu Mufaransa wari umaze kubaka ibigwi muri Los Bloncos.

Zinedine Zidane ahaye amahirwe menshi Antonio Conte na Arsene Wenger yo kuba bafata akazi ko gutoza Real Madrid.

Zinedine Zidane yageze mu ikipe ya Real Madrid mu mwaka wa 2016 asimbuye Rafael Benitez byari byacanze,azura ikipe ya Real Madrid,ayihesha igikombe cya UEFA Champions League gusa ntiyabasha gutwara La Liga mu mwaka we wa mbere.

Umwaka we wa kabiri Zidane yabaye igitangaza kuko yatwaye igikombe cya shampiyona La Liga ndetse yisubiza Champions League ku nshuro ya kabiri anyagiye Juventus ibitego 4-1.

Zinedine Zidane mu kiganiro n’itangazamakuru yagize ati "Ndabizi ko ari ibintu bitunguye buri wese gusa wese agomba kubyakira.Iyi kipe ikeneye gukomeza gutsinda n’impinduka.Nyuma y’imyaka 3,ikipe ikeneye uburyo bushya bw’imitoreze n’imivugire mishya,ndetse n’uburyo bushya bw’imikorere,niyo mpamvu nafashe umwanzuro wo gusezera.Nkunda iyi kipe,nkunda perezida wampaye amahirwe yo kuza nk’umukinnyi n’umutoza.Ndamushimiye kandi ndashimira buri wese wamfashije kuzana impinduka."

Zidane yaje ari umunyeshuli mu butoza none asezeye ari umunyabigwi aho benshi bibaza aho ari bwerekeze kuko amakipe yitwa ko akomeye yamaze kubona abatoza bashya.

Ibikombe Zinedine Zidane yari amaze guhesha Real Madrid:

La Liga: 2016-17

Supercopa de Espana: 2017

UEFA Champions League (3): 2015-16, 2016-17, 2017-18

UEFA Super Cup (2): 2016, 2017

FIFA Club World Cup (2): 2016, 2017