Umuririmbyi Zayn Malik waririmbanaga muri ‘One Direction’ na Liam Payne uheruka gupfa, yahagaritse ibitaramo yari afite bizenguruka Amerika nyuma y’igihombo cyo kubura umuvandimwe we.

Zayn Malik yateganyaga gutangira ibi bitaramo bizenguruka Amerika mu Cyumweru tugiye gutangira. Yari gutangirira igitaramo cye cya mbere muri San Francisco ku wa Gatatu tariki 23 Ukwakira 2024.

Mu butumwa yahaye abafana be yanditse ati “Nyuma yo kubona igihombo gishengura umutima twanyuzemo muri iki cyumweru, nafashe icyemezo cyo gusubika ibitaramo bizenguruka Amerika bya ‘Stairway to the Sky Tour’.”

Ibi bitaramo bya Malik bizenguruka Amerika byarimo no kuzajya mu mijyi ya Las Vegas, Los Angeles, Washington DC bikarangirira muri New York ku wa 3 Ugushyingo uyu mwaka.

Yabwiye abafana be kuri X ko amatariki yabyo azimurirwa muri Mutarama umwaka utaha, ndetse abari baguze amatike azakomeza kugira agaciro kayo kugeza icyo gihe.

Ibitaramo ateganya gukorera mu Bwongereza guhera ku wa 20 Ugushyingo kugeza ku wa 4 Ukuboza uyu mwaka byo amatariki yabyo azakomeza, kuba asanzwe.

Ku wa kane tariki 18 Ugushyingo Malik yahaye icyubahiro Payne, avuga ko azahora yibuka ibihe byiza bagiranye.

Ati “Nzahora mpa agaciro ibyo nkwibukiraho mu mutima wanjye iteka.’’

Payne na Malik babanaga muri One Direction ndetse bari bamwe mu bagize iri tsinda ry’abahungu gusa ryashingiwe muri The X Factor TV Show mu 2010.

Aba sibo bonyine bari barigize kuko bari banahuriyemo na Harry Styles, Louis Tomlinson na Niall Horan. Mu 2015 Malik yavuye mu itsinda atangira kwikorana umuziki ku giti cye ndetse na bagenzi be mu 2016 baratandukana.