Nubwo benshi bazi uranium nk’icyuma gikomeye gikoreshwa mu gukora intwaro kirimbuzi, ifite n’uruhare rukomeye mu guteza imbere ubuvuzi bugezweho, igafasha mu gutahura no kuvura indwara zitandukanye.

Ikigo International Atomic Energy Agency (IAEA) kigaragaza ko uranium itunganyijwe ku rugero ruciriritse ikoreshwa cyane mu nganda za nikleyeri z’ubushakashatsi (research reactors), aho ivamo utunyangingo twitwa neutrons dufasha mu gukora ibikoresho byifashishwa mu buvuzi.

Uko uranium ihinduka igikoresho cy’ubuvuzi

Mu nganda za nikleyeri (reactors), uranium-235 ishyushye itanga ingufu zituma havamo izindi isotopes zifite akamaro kanini mu buvuzi. Muri zo, izwi cyane ni:

– Molybdenum-99
– Ihindukamo Technetium-99m

Iyi technetium-99m ni yo ikoreshwa cyane ku isi mu gufata amashusho y’imbere mu mubiri (medical imaging), kuko ifasha abaganga kubona neza uko ingingo z’umubiri zikora.

Ifasha gute mu kuvura no gusuzuma indwara?
Ikoreshwa rya technetium-99m rituma:

– Hafatwa amashusho y’umutima harebwa uko utera amaraso
– Hagaragara kanseri hakiri kare
– Hasuzumwa amagufa n’imitsi
– Hamenyekana ibibazo by’imbere mu mubiri bitaboneka ku buryo busanzwe

IAEA ivuga ko hejuru ya 80% by’ibikorwa byo gufata amashusho kwa muganga ku isi bifashisha izi isotopes zikomoka kuri uranium.

Afurika nayo iri kwitegura kuyibyaza umusaruro

Ibihugu byinshi bya Afurika, harimo n’u Rwanda, biri gushora imari mu ikoranabuhanga rya nikleyeri rigamije guteza imbere ubuvuzi, cyane cyane mu gusuzuma no kuvura indwara zikomeye nka kanseri.

Ibi byitezweho kongera ubushobozi bw’ibitaro no kugabanya abarwayi bajya gushaka serivisi zihenze hanze y’ibihugu byabo.

Uranium: hagati y’iterambere n’umutekano

Nubwo uranium ifitiye akamaro kanini ubuvuzi n’ingufu z’amashanyarazi, ikoreshwa ryayo rikomeje guteza impaka ku rwego mpuzamahanga, cyane cyane ku bijyanye n’ibihugu bishobora kuyikoresha mu gukora intwaro kirimbuzi.

Ibihugu bikomeye nka Amerika bikomeje gukumira ibindi bihugu bishaka kuyitunganya cyane, nko mu bibazo bifitanye na Iran, bigamije kwirinda ikwirakwira ry’intwaro za nikleyeri.

Uranium si icyuma cy’intambara gusa; ni n’inkingi ikomeye mu buvuzi bugezweho, ifasha mu gukiza no kurengera ubuzima bwa benshi ku isi.