Kompanyi y’indege yo muri Irland yitwa Ryanair yirukanye abakozi bayo 6 bakoraga mu ndege imwe,kubera ifoto bakwirakwije ku mbuga nkoranyambaga igaca ibintu bari kwigaragambywa ko bafashwe nabi mu mujyi wa Malaga muri Espagne.

Abakozi bo muri imwe mu ndege ya Ryanair batandatu,bifotoje mu kwezi gushize baryamye hasi ku kibuga cy’indege cyo muri Espagne mu rwego rwo kwereka isi yose ko bafashwe nabi n’abakoresha babo,none byabaviriyemo kwirukanwa.

Aba bakozi batandatu bari mu ikipe y’abapilote 8 ndetse n’abakozi bakora mu ndege 16 baba muri Portugal,bababajwe n’uko bategetswe kumara amasaha menshi mu cyumba nyuma yo kurangiza urugendo,kubera incubi y’umuyaga yatikije uburayi yiswe Hurricane Leslie.

Aba bakozi birukanwe na ba shebuja kubera ko bateje isura mbi iyi kompanyi y’indege mu binyaamakuru bakerekana ko batishyuriwe hoteli ahubwo abayobozi babo babategetse kuryama hasi.

Aba bakozi basize icyashya iyi kompanyi ubwo bavugaga ko bashyizwe mu cyumba kimwe ntibahabwa aho kuryama bigatuma baryama hasi bisamirwa hejuru n’abakiliya bacika ururondogoro ku mbuga nkoranyambaga.

Ryanair yashyize hanze amashusho agaragaza ko iyi foto yaciye ibintu ku mbuga nkoranyambaga ari aba bakozi bapanze kuyifotoza ngo basebye iyi Kompanyi y’indegebityo bahisemo kubirukana.

Abakozi ba Ryanair bapanze gahunda yo gusebya iyi Kompanyi ku mbuga nkoranyambaga