Umugore w’umwarimu witwa Ekaterina Babkina w’imyaka 36 ukomoka mu mujyi wa Kiev muri Ukraine, yataye mu Nyanja abana be 2 babiri nyuma y’aho umugabo we bababyaranye amutaye akishakira umukobwa w’imyaka 18.

Nkuko iperereza ryabitangaje,uyu mugore yaroshye mu mazi umwana we w’umukobwa w’imyaka 6 witwa Anna w’imyaka 6,n’umuhungu we witwa Danil w’imyaka 5.

Ekaterina yabanje kujyana aba bana be muri restaurant abagurira pizza arangije abashora iy’umugezi abarohamo barapfa.

Ekaterina nawe yagerageje kwiyahura ntibyamukundira niko guhunga aho yaroshye aba bana gusa nyuma y’amasaha 24 yaje gufatwa na polisi amaze gukora urugendo rw’ibirometero 150 ahunga.

Uyu mugore akimara gutabwa muri yombi,yabwiye abapolisi ko yataye abana be mu Nyanja bagapfa kubera ko yashakaga kubakiza iherezo ry’isi.

Amakuru aravuga ko uyu mugore yagize ikibazo mu mutwe ubwo yamenyaga ko umugabo we witwa Denis Babkin w’imyaka 33,yamutaye akishakira undi mugore ukiri muto.

Umwe mu nshuti za Ekaterina yagize ati “Yahoraga afite ubwoba ko umugabo we azamuta akishakira umugore ukiri muto,bimubaho.Akibimenya yahise agira ihungabana mu mutwe.”

Abarimu bagenzi b’uyu mugore bavuze ko batunguwe n’iki gikorwa kigayitse yakoze,kuko yakundaga cyane abana be by’umwahariko umuhungu we.

Uyu mugore yafashwe ibizamini basanga afite ikibazo cyo mu mutwe kitatangajwe gusa yamaze gushyikirizwa urukiko ngo rumukanire urumukwiriye.