Jenerali Majoro Gaby Kasongo yatangiye ku mugaragaro inshingano ze zo kuyobora intara ya Ituri, iherereye mu majyaruguru y’uburasirazuba bwa Repubulika Iharanira Demokarasi ya Kongo (RDC).

Uyu muyobozi mushya wa gisirikare yiyemeje gushyigikira icyerekezo cya Perezida Félix Tshisekedi cyo guteza imbere amahoro n’ubumwe bw’abaturage.

Mu ijambo yagejeje ku bitabiriye uwo muhango, Jenerali Majoro Gaby Kasongo yashimiye Perezida Tshisekedi, amugaragaza nk’umurinzi w’ubwigenge n’ubusugire bw’igihugu. Yanamushimiye ku bw’imbaraga akomeje gushyira mu kugarura amahoro muri RDC yose.

Yashimangiye ko amabwiriza ya Perezida ajyanye no kubabarirana no guteza imbere ubumwe hagati y’abaturage n’amoko atandukanye azaba ari yo nkingi y’imiyoborere ye muri Ituri.

Kasongo asimbuye Liyetona Jenerali Johnny Luboya N’Kashama, wari waratangiye kuyobora iyo ntara ku wa 10 Gicurasi 2021, nyuma y’itangazwa ry’ibihe bidasanzwe by’umutekano muri Ituri no muri Kivu y’Amajyaruguru.

Icyo cyemezo cyari cyafashwe binyuze mu itegeko rya Perezida ryo ku wa 3 Gicurasi 2021, ryamburaga ububasha abayobozi ba gisivili rikabushyira mu maboko y’abasirikare kubera umutekano muke wari ugenda urushaho gukomera.

Ihererekanyabubasha ry’izi nshingano ribaye mu gihe gikomeye cyane, kuko intara ya Ituri ihanganye n’icyorezo cy’ubwoko bushya bwa Ebola buzwi nka Bundibugyo.

Iyo ntara yonyine imaze kubonekamo abantu 738 banduye, mu bantu 808 bamaze kwemezwa mu gihugu cyose. Ibi bivuze ko abarenga 91% by’abanduye bose babonetse muri Ituri.

Iyo ndwara yakwirakwiriye no mu ntara za Kivu y’Amajyaruguru na Kivu y’Amajyepfo. Kuva icyo cyorezo cyatangazwa ku wa 15 Gicurasi, abarwayi 48 bamaze gukira binyuze mu bukangurambaga bw’iminsi 32 bwo kuyirwanya bwatangijwe na Leta.

Uretse ikibazo cy’ubuzima, intara ya Ituri ikomeje no guhangana n’ibikorwa by’imitwe yitwaje intwaro, byatumye abantu barenga miliyoni imwe bava mu byabo mu gihe cy’imyaka irenga 20 ishize, mu baturage bagera kuri miliyoni umunani batuye iyo ntara.

Guverineri mushya w’iyo ntara agiye guhura n’ibibazo bibiri bikomeye: kugarura umutekano no guhuza ibikorwa byo kurwanya icyo cyorezo gihangayikishije isi yose.
Izindi nkuru wosoma:
– DR Congo: Guverineri w’Intara ya Ituri yibasiwe na Ebola yirukanwe
– Abadepite bahagarariye Kivu ya Ruguru na Ituri bikuye mu mirimo y’Inteko i Kinshasa